اكتب اي كلمه حلوه تمر فخاطرك

[قلوب]

يا جر قلبي جر لدن الغصوني
وغصون سدر جره السيل جرّا

على الذي مشيه تخط بهوني
والعصر من بين الفريقين مرّا

واكثر عذاب القب يوم سنحوني
بيح بصبري لو بغيت اتدرا

ياليتهم في الدرب ما واجهوني
وياليتهم ما زادوا الحر حرّا

ياليتهم بالحب ما ولعوني
كان أبعدوا عني بخيرٍ وشرا

ياليتهم عن حاجتي سايلوني
يوم اني اقعد عندهم واتحرا

ياليتهم من زادهم اطعموني
انا على زاد الحبيب اتجرا

لا مبعدٍ عنهم ولا قربوني
ولا عايف منهم ولاني مورا

ياليتهم عن رايهم علموني
اما يطيب القلب والا استمرا

وإلا أنهم يوم انهم ولعوني
خلوني أقضي عازتي واتدرا

لا والله اللي بالهوى هو جروني
هجرٍ به الحيلات عيت تسرا

يا عزتالي من تفرق شطوني
يعزا لي ارمي بالسلب واتعرا

لا ضاق صدري قمت اباري الضغوني
كني غريرٍ بالدلوهه مضرا

وقلبي عليه اشفق وتبكي عيوني
والحال من ود الحبيب تبرا

ادعج غنج يذبح بسود العيوني
يذبح الى منه هنف واستمرا

الخد برقٍ في علو المزوني
تقول برّاق من الصيف سرا

ان مت في دافي حشاه ادفنوني
في مستكن الروح ماهوب برا

بين النهود وقد روس القروني
عن الهبايب مستكن مذرا

ان مت في خد بعيد انقلوني
على هدي الزمل مشيه تدرا